FANM JODI
Jodijou nonm enkièt, yo ka mandé
Ola sé fanm-la konprann yo ké rivé…
Fanm kréyol doubout douvan jou.
Fanm kréyol ki goumé pou lanmou.
On manman ka véyé si nou
Pou nou pa jen égaré nou
On madanm plen dousè ka rann mwen fyè,
On model pou dèmen pou timoun an mwen.
Sé-y an té ké vlé sanm :
Sé li ki fanm.
Fanm jodi ka goumé pou li menm,
Fanm jodi ki ka mandé plézi.
A pa tou di fondé on fanmi
Lè travay sé on méyè zanmi.
I ka kouri, i ka bigidi,
Ka chèché sa i yé
Sa i vlé sé egzisté
Menm si i sav i pé tonbé, pa jen rilévé
Sa ka vo la penn
Nou po’o fin brizé chenn
Trasé pwop desten an nou
Grandi douvan jou.
Menm si nou tonbé,
Fo nou kontinyé,
Désidé ki fanm nou yé,
Sa nou vlé poté.
Fanm kréyol rivé
Mé pou sa i goumé,
Tann pawol, mové pansé
Avan i enpozé-y.
Fanm jodi osi
Ka ni pou sibi
Zyé mové ka dénonsé
Jenn fanm ka trimé.
On jou non-nou ké rézonné dan listwa-nou…
Florence Naprix